As persoas que desexen celebrar o concello de Rois unha cacharela na noite de San Xoán, o próximo martes 23 de xuño, xa poden solicitar a correspondente autorización municipal. O prazo para presentar as solicitudes permanecerá aberto ata as 14.00 horas do venres 19 de xuño.
A solicitude deberá incluír os datos da persoa responsable, unha fotocopia do DNI, a localización exacta da cacharela e unha descrición das súas características, indicando o tipo de celebración prevista e o terreo no que se realizará.
O Concello lembra que as solicitudes poden presentarse de forma presencial nas oficinas municipais ou a través da sede electrónica. Non se admitirán solicitudes enviadas por correo electrónico.
Co obxectivo de garantir a seguridade das persoas e evitar riscos para o medio natural, as cacharelas deberán cumprir as condicións establecidas no bando municipal.
Entre outras medidas, será obrigatorio manter a vixilancia permanente do lume, dispoñer de medios de extinción adecuados e respectar as distancias mínimas de seguridade respecto de vivendas, vehículos, instalacións, tendidos eléctricos e masas arbóreas.
Así mesmo, a cacharela deberá situarse nun lugar accesible para os servizos de emerxencia e manter unha faixa de seguridade libre de materiais combustibles nun radio mínimo de 15 metros. Tamén queda prohibida a utilización de líquidos inflamables para o acendido e a queima de materiais como plásticos, colchóns, rodas ou outros residuos que poidan producir gases tóxicos.
As autorizacións quedarán automaticamente suspendidas se as condicións meteorolóxicas incrementan o risco de incendio ou dificultan o control do lume. Ademais, os servizos de emerxencia e seguridade poderán ordenar a extinción inmediata da fogueira cando exista algún risco para as persoas, os bens ou o medio natural.
As solicitudes entenderanse autorizadas salvo que exista unha denegación expresa previa á celebración e sempre que se cumpran todas as condicións recollidas no bando municipal.
O bando completo e o modelo de solicitude poden consultarse e descargarse na ligazón habilitada.
