A concelleira de Deportes, Sandra González, vén de acompañar ao Club Metanoia “Artes Suaves” na presentación oficial do I Open de Brazilian Jiujitsu da contorna, unha cita deportiva pioneira que converterá a Noia nun referente desta disciplina o vindeiro 6 de xuño.
O evento, organizado polo Club Metanoia en colaboración coa federación portuguesa Desafio Brazilian Jiujitsu, celebrarase no Polideportivo Alonso Rodríguez e contará con competicións en categorías infantil, xuvenil, adulto e máster, tanto en GI como en NOGI.
Na presentación destacouse a gran acollida que está a ter esta primeira edición, que xa supera as 120 persoas inscritas. Pola súa banda, Maikon Lapa, representante da organización, sinalou que as previsións son moi positivas e que esperan alcanzar os 200 participantes nos próximos días.
Dende o Concello de Noia puxeron en valor a importancia de seguir impulsando eventos deportivos que atraian actividade á vila, fomenten hábitos de vida saudables e dean visibilidade a disciplinas en crecemento como o Brazilian Jiujitsu.
A xornada estará aberta ao público e desenvolverase, segundo fixo saber o Concello, “nun ambiente familiar e deportivo”, polo que a organización anima a todos os veciños e veciñas a achegarse ao pavillón para desfrutar dun día de deporte, convivencia e espectáculo deportivo arredor desta competición.
