O pleno da Corporación de Boiro celebrado este xoves 30 de abril deu luz verde ao proxecto para a rehabilitación do lagar, vivenda e cortes do Pazo de Goiáns coa finalidade de formalizar un convenio coa Deputación da Coruña para o seu financiamento.
O Concello de Boiro é propietario da finca e Pazo de Goiáns, un conxunto formado polo inmóbel principal, o pazo e a torre, e as construcións auxiliares que se atopan na finca.
Dende o Executivo local lembran que “todo o conxunto conta cun importante valor patrimonial que é preciso preservar polo que se acometeron xa as obras do inmoble principal e a capela”.
Mediante esta solicitude de subvención á Deputación da Coruña o que se pretende é continuar coa conservación e rehabilitación dos elementos patrimoniais do lagar pequeno, a vivenda e as cortes cun proxecto ascende aos 252.332,38 euros.
O proxecto que se pretende acometer contempla obras de consolidación urxentes de ámbito estrutural e tamén nas envolventes, executando as estruturas da cuberta derrubadas, saneado dos muros de pedra, a nivelación e conservación do piso, así como a recuperación ou instalación de carpinterías, portas e ventás das edificacións sobre as que se vai actuar.
