A deputada do Bloque Nacionalista Galego, Rosana Pérez, cualificou este 28 de abril de “situación crítica” o estado polo que atravesan numerosas confrarías de pescadores e mariscadoras galegas. A deputada da Pobra do Caramiñal rexeitou “rotundamente” que as choivas sexan o problema principal do marisqueo neste ano 2026, tal e como suxire o Goberno autonómico, engadindo que “o problema principal do marisqueo no ano 2026 é a ineptitude e a inutilidade dunha consellería que leva anos sen atender ao sector marisqueiro”, afirmou con contundencia. Neste sentido, subliñou que as inclemencias meteorolóxicas son “a puntilla para un sector que a propia consellería leva anos abandonando”.
A deputada nacionalista alertou sobre a “perda de traballadores e traballadoras do marisqueo continua e cada vez maior, unha sangría que ten como principal consecuencia que moitas confrarías sexan incapaces de manter a súa propia estrutura”, dixo, engadindo que “hai confrarías neste país, non unha nin dúas, que están a piques de pechar a súa porta”.
Como exemplo máis destacado, Pérez citou a Confraría da Pobra do Caramiñal, unha entidade con “case cen anos de existencia” que conseguiu superar temporais, crises e choivas ininterrompidas, pero que é “incapaz de resistir e superar as políticas absolutamente lesivas deste goberno e desta Consellería do Mar”. Xunto a ela, mencionou outras confrarías en situación “hipercrítica” como as de Mugardos, Cabo de Cruz, Rianxo ou Vilanova.
A este respecto, o BNG presentou unha proposición non de lei que contiña catro medidas urxentes: “Avaliar con rigor a situación das confrarías, habilitar unha liña de axudas directas e urxentes para evitar a súa desaparición, articular préstamos a través do IGAPE con condicións favorábeis, e que a Consellería asuma o cen por cen dos custos de vixilancia e asistencias técnicas durante o tempo necesario para a normalización”, lembrou Pérez, engadindo que “esta proposición non de lei para fortalecer as confrarías de pescadores foi rexeitada cos votos en contra do PP”.
