O Concello de Boiro vén de recibir unha subvención da Consellería de Emprego, Comercio e Emigración para levar a cabo o Obradoiro de Emprego Torre Goiáns V durante o curso 2026-2027 nas especialidades de forestal e carpintería. O obradoiro está destinado a 20 alumnos/as traballadores.
A formación estará dividida en dúas especialidades con 10 alumnos/as en cada unha; por unha banda Repoboacións forestais e tratamentos silvícolas e pola outra Instalación de elementos de carpintería. O alumnado contará cun contrato de traballo para formación e aprendizaxe a tempo completo de 40 horas semanais cun horario de 7.30 a 15.30 horas de luns a venres.
O alumnado participante formarase de xeito teórico e tamén práctico realizando tarefas de prevención en materia de incendios mediante a consolidación de frondosas e limpeza de faixas secundarias; tamén traballos de conservación de valorización do Camiño A Orixe; integración de elementos de madeira no Pazo de Goiáns; mellora da sinalización do Camiño A Orixe; mellora e creación de pasarelas en Barraña, Carragueiros e Mañóns e mellora das instalación dos elementos de carpintería nos Centros Sociais do concello.
O inicio do curso está previsto para o 1 de xuño polo que o Concello de Boiro iniciará nas vindeiras semanas o proceso selectivo para os 20 alumnos e alumnas así como para o persoal docente. Para participar será necesario estar inscrito como demandantes de emprego na Oficina de Emprego na modalidade de “taller de emprego”.
Para levar a cabo o Obradoiro de Emprego Torre Goiáns V o Concello de Boiro recibe da Consellería de Emprego, Comercio e Emigración da Xunta de Galicia unha subvención por importe de 467.052,00 euros.
