A Deputación da Coruña pechou este xoves 16 de abril a súa participación no 39.º Salón Gourmets e fíxoo cun balance “moi positivo” tras catro días de intensa actividade na principal feira internacional de alimentación e bebidas de alta gama do Estado, celebrada en IFEMA, Madrid.
O vicepresidente e deputado de Turismo e Promoción Económica, Xosé Regueira, valorou “moi favorabelmente” a presenza da institución provincial nesta nova edición do evento e destacou que “seguimos consolidando a provincia da Coruña como unha referencia gastronómica no contexto internacional”.
Regueira subliñou que a participación da Deputación neste tipo de encontros profesionais “permite abrir novas vías de negocio e facilitar contactos entre produtoras, produtores e profesionais do sector”, ao tempo que reforza a visibilidade da marca gastronómica provincial, A paisaxe que sabe.
O vicepresidente destacou tamén o éxito da programación desenvolvida ao longo dos catro días, na que se sucederon degustacións, catas, relatorios e showcookings protagonizados por produtoras, produtores e profesionais da restauración da provincia. “A proposta que trouxemos a Madrid demostrou, unha vez máis, a extraordinaria calidade dos produtos da nosa terra e o altísimo nivel da restauración coruñesa”, afirmou.
Participaron, entre outras/os marcas, establecementos e chefs, Cafés Aruba, Luís Paadín, Noelia Rodríguez (do restaurante Casa Peto de Outes, achegando destacados showcookings nos que elaborou mexillón en escabeche Leocadia e tosta de sardiña afumada de Portosín), Adrián Felípez (do Restaurante Miga da Coruña), Gallegas de Nata (A Coruña), A Conserveira (Ribeira), Juan Crujeiras (O Bido da Coruña), Iria Espinosa (Árbore da Veiga) ou Chichalovers (Santiago).
