A Policía Local de Rianxo enfilou o inicio dos festexos do Entroido (a semana pasada) atendendo unha manchea de incidencias e acometendo un bo número de accións de vixilancia e seguridade cidadá, entre as que se incluíron varios controis preventivos de tráfico e a participación nunha campaña especial de vixilancia de camións e autobuses impulsada pola Dirección Xeral de Tráfico – España, dando como resultando as seguintes intervencións:
Delitos contra a seguridade viaria. Instruíronse 4 atestados:
Tres alcoholemias positivas.
Un atestado por conducir co permiso retirado por orde xudicial e por condución temeraria ao poñer en perigo concreto ao resto de usuarios da vía fuxindo dos axentes tras darlle o alto.
Infraccións administrativas en materia de tráfico. Tramitáronse:
4 denuncias administrativas por alcoholemia.
1 denuncia administrativa por positivo en drogas.
3 denuncias por infraccións relativas á documentación de vehículos e condutores.
1 denuncia por circular sen seguro obrigatorio, procedéndose á inmobilización do vehículo.
Actuacións en materia de seguridade cidadá:
Recuperáronse 2 bicicletas que foran furtadas dentro dun edificio, identificándose ao presunto autor e instruíndo un atestado por delito contra o patrimonio.
Incautáronse diversas doses de substancias estupefacientes (cocaína e heroína), tramitándose as denuncias oportunas.
Interveuse un obxecto perigoso utilizado como arma.
Efectuáronse varias intervencións por incidencias na vía pública e en vivendas.
Realizáronse numerosas identificacións preventivas en zonas onde se están a producir furtos e roubos, incluídas as inmediacións das instalacións do Punto Limpo.
Ademais, no marco da campaña específica de control de camións e autobuses non se rexistrou ningunha infracción, o que, en palabras dos axentes, “reflicte un comportamento responsábel por parte dos profesionais do sector”.
