Este 14 de maio foi unha xornada para lembrar na Asociación Amicos: unha xornada de celebración. Segundo informaron os responsábeis da entidade, logo dunhas cantas semanas de intenso traballo para plantar cara á COVID-19 nas instalacións da residencia que Amicos ten en Boiro, o virus foi finalmente superado por todos os residentes e traballadores que permanecían en corentena por tela contraído.
Dende o centro agradecen o importante labor de todas as persoas que colaboraron para a superación da crise (entre os que se conta o persoal do SERGAS mobilizado) e que “contribuíron a que se superase esta etapa na asociación”.
Como lembraremos, o pasado 8 de abril confirmáronse 30 casos de contaxio entre os residentes da Residencia Amicos por COVID-19. A partir de aí viñeron semanas de seguimento, coidados, control presencial-telemático para os residentes, corentena nos fogares para o persoal técnico e medidas exhaustivas de loita contra o coronavirus que veñen de saldarse definitivamente cun éxito total de todas as persoas implicadas: a curación de todos os pacientes (residentes e técnicos) afectados pola infección.
