Esta longa fin de semana que vimos de deixar atrás trouxo boas novas da Residencia Amicos de Boiro, onde, como lembraremos, foron confirmados o pasado 8 de abril 30 casos de contaxio entre os residentes por COVID-19. Segundo fixo saber a asociación dende o seu Facebook cun exhaustivo parte informativo, os pacientes (residentes e técnicos) están a evolucionar de maneira favorábel e presentan bo estado de saúde.
Polo que respecta ás persoas residentes, todas elas atópanse en seguimento e control presencial e telemático, por persoal do SERGAS e da propia asociación Amicos para persoas con diversidades funcionais e cognitivas. Como dixemos, a súa evolución e sintomatoloxía son positivas.
Polo que atinxe ao persoal técnico, a ducia de persoas contaxiadas áchase neste intre en estado de corentena nos seus fogares e reciben seguimento telemático do Servizo Galego de Saúde. A súa situación, segundo confirmou a dirección de Amicos, tamén é favorábel.
Esta fin de semana ficaban operativos 37 técnicos asegurando a atención dos residentes do centro. Amais, a asociación engadiu que foi posíbel recadar stock de material de protección para case dúas semanas, grazas ao chamamento público feito pola dirección de Amicos. Con todo, confirmouse un déficit de máscaras FFP2 para a atención directa dos positivos.
