A Xunta de Galicia activou para este luns a alerta laranxa por temporal costeiro no litoral das provincias da Coruña e Pontevedra. A medida adóptase co obxectivo de garantir a seguridade das persoas e os bens ante a previsión dun empeoramento significativo das condicións meteorolóxicas.
Segundo informa a Axencia Estatal de Meteoroloxía (Aemet) , o fenómeno meteorolóxico adverso estará activo desde primeiras horas da mañá. Prevese vento do sur ou suroeste de forza 8 e mar combinada do suroeste con ondas que poderán alcanzar os cinco metros de altura.
Ante esta situación, a Dirección Xeral de Emerxencias e Interior, dependente da Consellería de Presidencia, Xustiza e Deportes, comunicou a activación da alerta a través do Centro Integrado de Atención ás Emerxencias 112 Galicia aos concellos das provincias afectadas, así como a deputacións, servizos náuticos, agrupacións de voluntarios de Protección Civil e clubs provinciais, entre outros organismos.
Como consecuencia da alerta laranxa, a Secretaría Xeral para o Deporte anunciou a suspensión de toda a actividade deportiva no mar, tanto federada como incluída no programa Xogade, nos concellos afectados, de acordo coas previsións dos organismos meteorolóxicos, que poden consultarse na web de Deporte Galego.
A Xunta insiste na importancia de extremar as precaucións e seguir as recomendacións de seguridade, como manterse afastado da liña de costa —especialmente de diques, rompentes e paseos marítimos—, revisar os cabos e amarres das embarcacións e evitar calquera actividade innecesaria no mar.
Así mesmo, aconséllase á cidadanía consultar a páxina web do CIAE 112 (www.axega112.gal
), onde se ofrece información meteorolóxica actualizada e ligazóns de interese relacionados coa evolución do temporal.
