O Concello de Ribeira realizou a entrega de alimentos non perecedoiros destinados a dúas entidades sociais que desenvolven o seu labor no municipio: Cáritas e ICE Renovación. Esta iniciativa ten como obxectivo incrementar o respaldo da Administración local a ambas entidades para apoiar, especialmente nestas datas, ás persoas en situación de vulnerabilidade.
A través da Concellería de Servizos Sociais, o Concello investiu máis de 4.000 euros na adquisición de alimentos básicos como galletas, aceite, fariña, leite, pasta ou arroz, co fin de reforzar os bancos de alimentos destas organizacións.
A alcaldesa de Ribeira, María Sampedro, sinalou que “a maiores da axuda que prestamos directamente dende o Concello, queremos tamén reforzar os bancos de alimentos de dúas entidades de encomiable labor no noso municipio como son Cáritas e ICE Renovación, especialmente nestas datas, e axudar así con algo tan esencial como é a alimentación a persoas en situación de vulnerabilidade”. Sampedro puxo ademais en valor “a vital importancia que ten o noso tecido asociativo neste ámbito”.
No mesmo sentido pronunciouse o concelleiro de Servizos Sociais, Vicente Mariño, quen destacou que esta actuación “dá continuidade a unha colaboración con dúas entidades que son importantísimas para establecer sinerxías coa Administración local e amplificar a capacidade de mellorar a calidade de vida dos nosos veciños”.
Con esta acción, o Concello de Ribeira reafirma o seu compromiso coa atención social e co apoio ás entidades que traballan de maneira directa coas persoas que máis o precisan.
