A delegada da Xunta na Coruña, Belén do Campo, xunto ao alcalde de Outes, Francisco Calo, presentaron este venres a nova desbrozadora de brazo articulado adquirida polo Concello grazas a unha axuda autonómica de case 30.000 euros. Este equipamento permitirá mellorar os traballos de limpeza e mantemento de camiños e pistas municipais, actuacións clave tanto para a prevención de incendios forestais como para a protección do medio natural.
Esta achega súmase a outra subvención de máis de 13.000 euros recibida polo Concello de Outes para a contratación, durante tres meses do pasado verán, dunha brigada ambiental formada por catro traballadores, compartida co Concello de Mazaricos. Ambas as dúas axudas, que no seu conxunto ascenden a 43.000 euros, foron concedidas ao abeiro do Fondo de Compensación Ambiental (FCA) na súa modalidade competitiva.
Durante a visita, Belén do Campo destacou a aposta decidida do Concello de Outes polo coidado do medio ambiente e pola conservación dos seus espazos naturais. Neste senso, puxo en valor actuacións como a limpeza de vías municipais, fundamentais para garantir a seguridade, a accesibilidade e a preservación do valor ambiental do territorio.
Na actualidade, Outes conta con tres tractores equipados para a limpeza de beiravías, polo que, segundo explicou a delegada, resultaba necesaria a renovación do equipamento mediante a adquisición desta nova desbrozadora de brazo, co obxectivo de optimizar os recursos dispoñibles e mellorar a eficiencia dos traballos realizados.
Unha parte importante das actuacións previstas coa nova maquinaria desenvolveranse en zonas de espazos naturais, o que reforza a necesidade de contar con medios adecuados e respectuosos co entorno. A desbrozadora presentada ten un alcance de cinco metros e está equipada cun cabezal cun ancho total de 1,40 metros e un ancho efectivo de corte de 1,20 metros, o que permitirá un mantemento máis eficaz do municipio.
Cooperación institucional
Belén do Campo salientou tamén a importancia da cooperación entre administracións como “peza clave para avanzar na protección do patrimonio natural galego”. Na comarca de Barbanza, xunto a Outes, tamén resultaron beneficiarios da liña competitiva do FCA os concellos de Boiro, Noia, Lousame e Ribeira, así como outra axuda compartida entre Outes e Mazaricos, cun investimento total de case 147.000 euros para seis concellos.
“Os concellos son as administracións que mellor coñecen o territorio e as súas necesidades, e por iso desempeñan un papel fundamental na súa protección e xestión sostible”, subliñou a delegada.
Compromiso coa sustentabilidade
A representante do Goberno galego lembrou que a Xunta reafirma o seu compromiso co desenvolvemento sostible a través do Fondo de Compensación Ambiental 2025, que destina 9,2 millóns de euros a iniciativas ambientais en toda Galicia. Na provincia da Coruña, as dúas liñas do fondo contaron cun investimento total de preto de 3 millóns de euros, repartidos entre a modalidade non competitiva, con máis de 2,2 millóns para 49 beneficiarios, e a competitiva, con case 700.000 euros para 26 entidades locais.
Belén do Campo destacou que o FCA é unha ferramenta clave para protexer a biodiversidade, preservar o patrimonio natural e promover a recuperación sostible dos concellos galegos, consolidando unha Galicia máis verde, equilibrada e comprometida co futuro.
