A Xunta colabora co Concello de Porto do Son na primeira fase da mellora do complexo deportivo da Tarela
A Xunta de Galicia colabora co Concello de Porto do Son na primeira fase das obras de mellora do complexo deportivo da Tarela, a través da concesión dun préstamo do Fondo de Cooperación para municipios de menos de 50.000 habitantes por un importe superior aos 390.000 euros.
A conselleira de Vivenda e Planificación de Infraestruturas, María M. Allegue, asinou hoxe co alcalde de Porto do Son, José Luis Oujjo, o convenio que permitirá financiar parte desta actuación. O acordo formalizouse esta mañá en San Caetano.
O obxectivo do convenio é executar os traballos necesarios para crear e ordenar un aparcadoiro que dea servizo aos usuarios do complexo deportivo, que inclúe piscina e ximnasio, mellorando así o acceso en vehículo e a mobilidade no contorno da instalación.
A actuación prevista inclúe tamén o incremento e a optimización da superficie útil destinada á práctica de actividade física, mellorando as condicións de uso e adaptando os espazos ás necesidades actuais da veciñanza.
O investimento total da obra ascende a preto de 650.000 euros e poderá levarse a cabo grazas ao apoio do Fondo de Cooperación da Xunta, unha iniciativa dirixida a financiar actuacións de conservación do patrimonio, rexeneración urbana ou adquisición de inmobles para a súa rehabilitación en concellos de menor poboación.
O préstamo concedido é sen xuros e devolverase nun prazo de oito anos, enmarcándose na convocatoria de 2025 desta liña de axudas, que conta cun orzamento global de 3,7 millóns de euros
