O Concello de Rianxo convida á veciñanza a coñecer os resultados do Laboratorio Ecosocial do Barbanza, un proxecto pioneiro no que a Plataforma pola Defensa do Monte e as comunidades de montes de Rianxo traballan xunto con outras entidades pola xestión sostíbel do territorio. O acto institucional de presentación terá lugar no Pazo de Martelo (Praza Rafael Dieste, Rianxo) este venres 5 de decembro, de 12:00 a 14:00, e permitirá compartir seis anos de traballo que están a consolidar o Laboratorio como un proxecto referente na prevención de incendios, recuperación de
terras en abandono, creación de emprego verde e fortalecemento da biodiversidade no Barbanza.
No evento intervirán Julián Bustelo, alcalde de Rianxo; Rosa Ana García, deputada de Emprego e Industria da Deputación da Coruña; e Julio Abalde Alonso, subdelegado do Goberno de España na Coruña, xunto a outros representantes das entidades socias do proxecto.
Co apoio da Fundación Biodiversidad do Ministerio para la Transición Ecológica y el Reto Demográfico (MITECO) no marco do PRTR —financiado pola Unión Europea–NextGenerationEU— o Laboratorio consolidou desde 2023 un amplo programa de intervencións que está demostrando o potencial da colaboración entre comunidades de montes, concellos e entidades sociais para transformar o territorio desde unha perspectiva ambiental, social e económica. De feito, o proxecto foi recoñecido polo MITECO como unha das 39 iniciativas exemplares do PRTR, destacando entre mais de 1.000 proxectos subvencionados pola súa capacidade de coordinación entre axentes públicos e locais, e polo seu impacto ambiental e social no territorio.
Axenda da xornada
12:00 – Recepción
Presentacións institucionais
12:10 – Inicio do evento por Julián Bustelo, alcalde de Rianxo
12:20 – Rosa Ana García, deputada de Emprego e Industria da Deputación da Coruña
12:30 – Julio Abalde Alonso, subdelegado do Goberno de España na Coruña
12:40 – Vídeo do proxecto
Presentacións técnicas
12:45 – Adrián Capelo, xestor do proxecto na Fundación RIA
13:00 – Rafael Saco, presidente da Plataforma pola Defensa do Monte Cóctel
13:20 – Cóctel
14:00 – Fin do evento
