O Consello da Xunta autorizou hoxe a licitación do contrato de xestión do servizo de atención residencial para persoas maiores dependentes na residencia de Ribeira, de titularidade autonómica. O obxectivo é consolidar as 106 prazas públicas existentes neste centro.
O contrato terá unha duración inicial de dous anos, desde o 26 de marzo de 2026 ata o 25 de marzo de 2028, coa posibilidade de prorrogalo por períodos dun ano ata un máximo de cinco. O orzamento base de licitación ascende a 5,6 millóns de euros, mentres que o valor estimado total, incluíndo as posibles prórrogas, chega aos 16,2 millóns.
Tras a autorización do Consello da Xunta, procederá a publicarse o anuncio de licitación na plataforma de contratos públicos de Galicia e no Diario Oficial da Unión Europea (DOUE). As empresas interesadas disporán dun prazo de 30 días naturais para presentar as súas ofertas.
