Os Concellos da nosa comarca (Boiro, A Pobra do Caramiñal, Ribeira, Rianxo, O Son, Noia, Lousame, Outes, Carnota) confirmaron estes días a súa participación na iniciativa Veciño Solidario, a plataforma de axuda a cidadáns afectados polo COVID-19 impulsada por EME Sports e coa que se pretende recadar fondos para loitar contra a pandemia. A proposta, segundo informou hoxe en detalle o Concello de Boiro, consiste nun servizo-ferramenta para facer doazóns de maneira sinxela, aproveitando o propio sistema que a empresa usa para as inscricións de probas deportivas.
Neste proxecto participan xa 45 Concellos galegos, entre os que están (como dixemos) todos os de Barbanza e Muros e Noia, e está aberto a calquera outro municipio que queira unirse.
A acción, engaden dende Boiro, consiste en tirar proveito da plataforma web que EME Sports emprega para facer as inscricións de eventos deportivos, adaptada para que calquera poida facer a súa contribución e destinala ao Concello que desexe.
Esta plataforma permite facer as doazóns de maneira segura, confidencial, sinxela e dirixida aos veciños. Cada persoa ten a opción de dirixir a cantidade que desexe ao Concello ou Concellos que decida e cada administración dirixe a contía recadada as accións sociais ou colectivos que o precisen.
O Concello de Boiro confirmou que vai empregar a cantidade recadada nas accións sociais que se realizan no municipio desde o departamento de Servizos Sociais en colaboración coas entidades locais de Cáritas e Cruz Vermella. “As entidades están a facer un labor moi importante de atención e entrega de alimentos, medicinas e bens de primeira necesidade a persoas en situación vulnerábel”, engadiron dende o Goberno boirense.
