A Policía Local de Ribeira emitiu un comunicado para a veciñanza no que advirte dos cambios realizados na explanada do porto de Santa Uxía en relación cos estacionamentos libres que até o de agora se viñan facendo na contorna dos peiraos flotantes, reflectindo a información publicada nun bando informativo de Portos de Galicia. En relación a este bando, a Policía Local de Ribeira lembra que dende o vindeiro luns 10 de novembro, os aparcamentos sinalizados de cor verde, na beira dos pantaláns das embarcacións da Terceira Lista, estarán reservados para os profesionais do mar, dende as 00:00 horas de cada luns ata as 24:00 horas de cada venres, agás os días festivos.
Lembran tamén que a vixilancia do cumprimento desta sinalización compete ao Ente Público Portos de Galicia, por medio da Policía Portuaria.
Asemade, recordan que a beira máis próxima á avenida do Malecón, tamén de cor verde, continuará sendo de libre estacionamento.
Prégase tamén á cidadanía que teña en conta que ás 07:00 horas dos sábados segue vixente a reserva dos estacionamentos para os postos do mercadiño semanal ambulante.
