O Concello de Ribeira adquiriu un vehículo con distintivo ambiental grazas á colaboración da Xunta de Galicia co obxectivo de reforzar o equipamento da Policía Local no desenvolvemento das súas funcións, entre as que se atopan as preventivas de protección ambiental e espazos naturais, intervencións e xestión de situación de risco ou sinistro, a recollida de mostras de residuos ou vertidos e actuacións relacionadas coa prevención e
defensa contra os incendios forestais.
A alcaldesa e titular da área de Seguridade Cidadá, María Sampedro, participou na recepción do vehículo xunto co inspector xefe do corpo
policial, José Manuel Bretal, e o axente, Adrián Chorén. “Esta adquisición fortalece os medios materiais para o desenvolvemento das tarefas habituais dos axentes. E o novo coche conta con selo conforme se respecta o medio ambiente”, explicou a rexedora.
Tralo proceso de licitación, o contrato de subministración do vehículo adxudicouse á empresa Técnicas y Servicios de Automoción, S.A. por
un importe de 38.119,60 euros, IVE incluído, subvencionado en parte polo Fondo de Compensación Ambiental.
