O Diario Oficial de Galicia (DOG) publicou este xoves 30 de outubro a resolución que dá publicidade ás festas laborais de carácter local para o ano 2026 en Galicia inhábiles para os efectos laborais, retribuídas e non recuperábeis.
En canto ás sete grandes cidades, os festivos locais marcados na Coruña son o 17 de febreiro (martes de Entroido) e o 7 de outubro (festividade do Rosario); en Ferrol, o 7 de xaneiro (festividade de San Xiao) e o 6 de abril (Nosa Señora de Chamorro); e en Santiago de Compostela, o 17 de febreiro (martes de Entroido) e o 14 de maio (Ascensión).
No caso de Lugo, os festivos elixidos son o 17 de febreiro (martes de Entroido) e o 5 de outubro (San Froilán), mentres en Ourense tamén escollen o 17 de febreiro e logo optan polo 11 de novembro (San Martiño). En relación coa cidade de Pontevedra, as datas de festas laborais serán o 18 de febreiro (Mércores de Cinza) e o 11 de xullo (San Bieito). Pola súa banda, Vigo terá como festivos locais o 28 de marzo (festa da Reconquista) e o 17 de agosto.
Resto de festivos
Dos outros 12 festivos restantes, á marxe dos locais, nove son de carácter obrigatorio e non substituíbeis a non ser que coincidan en domingo: 1 de xaneiro, Venres Santo, 1 de maio, 15 de agosto, 12 de outubro, 1 de novembro, 6 de decembro, 8 de decembro e 25 de decembro. No ano 2026 hai dous festivos nacionais de carácter obrigatorio que coinciden en domingo: o 1 de novembro e o 6 de decembro, que son substituídos polo 19 de marzo e 24 de xuño.
Os outros tres festivos de carácter nacional son opcionais, é dicir, poden ser substituídos polas comunidades autónomas: o 6 de xaneiro, que en Galicia nunca se cambia, agás que coincida en domingo; o Xoves Santo (que en 2026 se celebrará o 2 de abril), que na Comunidade galega non se modifica de xeito tradicional; e dáselle a opción ás comunidades de escoller como opcional entre o 19 de marzo e o 25 de xullo. A Xunta sempre elixe o 25 de xullo, xa que é o Día Nacional de Galicia, tal e como quedou establecido polo Decreto 8/1978, do 10 de xullo.
Concellos do Barbanza e da contorna
Boiro: 16 de xullo, festividade do Carme; 31 de agosto, festividade de San Ramón.
Carnota: 20 de marzo, festa local de Carnota; 7 de decembro, festa local de Carnota.
Dodro: 6 de abril, Luns de Pascua; 7 de setembro, festa da Virxe das Dores.
Lousame: 10 de agosto, San Lourenzo; 2 de outubro, San Roquiño.
Muros: 29 de xuño, festa de San Pedro; 16 de xullo, festa do Carme.
Noia: 16 de febreiro, Luns de Entroido; 16 de xullo, festa da Virxe do Carme.
Outes: 18 de febreiro, Mércores de Cinza; 29 de setembro, San Miguel.
Padrón: 6 de abril, Luns de Pascua; 6 de maio, San Xoán do Raio.
Pobra do Caramiñal, A: 17 de agosto, Luns do Carme dos Pincheiros; 21 de setembro, Luns do Nazareno.
Porto do Son: 16 de febreiro, Luns de Entroido; 9 de setembro, festa local de Porto do Son.
Rianxo: 16 de xullo, festa do Carme; 18 de setembro, Venres de Guadalupe.
Ribeira: 17 de febreiro, Martes de Entroido; 16 de xullo, O Carme.
Rois: 6 de abril, Luns de Pascua; 15 de maio, Santo Isidro Labrador.
