O BNG de Outes, a través do seu voceiro Anxo Núñez, vén de emitir un comunicado no que acusa ao PP de ter feito “un copia e pega coas súas mocións de censura en Outes e en Ribeira, un copia e pega que é probábel que se tivera escrito dende Santiago”, sinala a agrupación, engadindo que “así o demostra un vídeo da moción de censura de Outes que coincide, palabra por palabra, co presentado noutros concellos coma Ribeira”. O BNG, que puxo o vídeo en cuestión na Rede para quen queira visualizalo (con frases e parágrafos enteiros que se repiten punto por punto) sinala que son máis de cinco minutos que indican “que as mocións de censura veñen dende a sede do PP en Santiago e non atenden á realidade municipal, só pretenden satisfacer os intereses electoralistas do seu partido á conta de toda a veciñanza”.
Anxo Núñez remata as súas declaracións coa seguinte pregunta: “Se non se molestan o máis mínimo en facer unha moción de censura que argumente, en cada caso, os motivos… Como se van a molestar en gobernar e preocuparse polos intereses da veciñanza de Outes?”
