O alcalde de Noia, Francisco Pérez, acolleu este mércores 15 de outubro, no Concello, unha visita dunha delegación da Deputación da Coruña, encabezada pola deputada provincial de Obras e Servizos, Mónica Rodríguez Ordóñez, co obxectivo de analizar e coordinar actuacións destinadas a mellorar a seguridade viaria en distintos puntos do termo municipal. Durante a reunión, estudáronse diversas propostas de intervención, sobre todo no lugar da Ponte e na estrada de Sobreviñas. En ambas áreas detectáronse necesidades urxentes de mellora para garantir unha circulación máis segura e cómoda tanto para vehículos como para peóns.
O alcalde de Noia, Francisco Pérez, destacou que “a seguridade viaria é unha prioridade para este Goberno municipal, especialmente en zonas nas que os veciños e veciñas levan tempo demandando solucións. A nosa intención é que estas actuacións se concreten canto antes para dar resposta ás
súas necesidades e mellorar a calidade de vida en todo o municipio”.
Pola súa banda, a deputada provincial Mónica Rodríguez Ordóñez subliñou “a total disposición da Deputación da Coruña para colaborar co Concello de Noia en todas aquelas actuacións que contribúan a incrementar a seguridade e o benestar da cidadanía”, e expresou o seu compromiso de seguir
traballando conxuntamente co goberno local para impulsar os proxectos que se definan nos próximos meses.
