O alumnado de quinto curso do CEIP Santa Baia, un total de cincuenta e seis rapaces e rapazas, foi este 7 de outubro protagonista da xornada de benvida da exposición itinerante Amiríos en Boiro, celebrada no inicio do paseo da praia de Barraña, á altura do Polideportivo Praia Xardín.
Os nenos e nenas participaron en diferentes xogos de sensibilización ambiental guiados polos axentes medioambientais de Amicos, persoas con discapacidade intelectual que, segundo lembran dende a asociación inclusiva do Barbanza, “exercen un papel clave como activistas pola conservación da biodiversidade”.
A través destas dinámicas, o alumnado puido coñecer mellor a riqueza natural dos ríos galegos, o ciclo da auga e a importancia de facer un uso responsábel deste recurso.
Ao acto asistiu o concelleiro de Política Social de Boiro, Raúl Treus, que destacou que “no Concello de Boiro estamos moi contentos de ter unha entidade social como é Amicos, porque non só traballa coas persoas con discapacidade nos termos de accesibilidade e inclusión, senón tamén de forma transversal en moitos outros eidos como o medioambiental”.
“Hai un ratiño xogamos coa rapazada a diferentes xogos de cadeas tróficas, do ciclo da auga, reciclaxe…”, continuou Treus, engadindo que “e un orgullo ter a unha entidade coma esta, que faga actividades como estas, reverten positivamente na sociedade. Aquí temos o exemplo claro, un espazo onde uns nenos e uns adultos traballan todos xuntos a inclusión no ámbito do medio ambiente e da protección da natureza”.
Pola súa banda, Andrea Vázquez, profesora do Dual Natura II en Amicos, fixo fincapé en que “o proxecto estase a desenvolver en moitos puntos do Barbanza e de Pontevedra, e xa temos a moitos colexios implicados nesta actividade. Contamos con moitos xogos lúdicos sobre o coidado dos ríos, polo que nos estamos divertindo moito e pasándoo moi ben no marco de AmiRíos, tanto o alumnado como os nosos axentes medioambientais”.
Unha mostra viaxeira para concienciar á poboación
Amiríos consiste en tótems informativos que abordan a riqueza natural dos ríos galegos e os retos que afrontan. A iniciativa pretende achegar á cidadanía, en especial á comunidade escolar, a necesidade de conservar a vida nos ríos da zona hidrográfica Galicia Costa.
Ao longo dos meses de setembro e outubro, a mostra poderá visitarse en Ribeira, Boiro, Lousame, A Pobra do Caramiñal, Caldas de Reis, Pontecaldelas, Meis e Pontevedra.
Sensibilizar con accións lúdicas e xornadas de voluntariado
Ademais da exposición, o proxecto AmiRíos abrangue actividades educativas e de voluntariado ambiental, que inclúen xornadas temáticas en colexios e campamentos, así como intervencións directas en ríos como o Soñora, Artes, Rego do Tállara, Lérez, Sar ou Quintáns, a través da restauración de vexetación autóctona e a erradicación de especies invasoras. Estas accións están conducidas polas Ecobrigadas de Amicos.
