O Concello de Padrón deu a coñecer os resultados do estudo sociolóxico municipal realizado este verán co obxectivo de coñecer a opinión da cidadanía sobre o Derbi Asnal, unha das citas máis singulares e tradicionais do calendario festivo local.
A enquisa, elaborada mediante 408 entrevistas telefónicas asistidas por ordenador (CATI) entre o 4 e o 7 de agosto, revela que un 68,4% dos veciños e veciñas apoia que a carreira de burros continúe celebrándose nas próximas edicións das festas padronesas.
Este estudo forma parte do compromiso adquirido polo Concello o pasado mes de xullo, cando se anunciou a intención de promover unha consulta independente para coñecer con rigor a opinión da poboación arredor deste evento. A decisión adoptouse tras o debate social e político xerado polo regreso do Derbi Asnal en 2025 —logo da súa ausencia en 2024—, cando a Asociación do Burro Fariñeiro (Abufa) organizou a carreira fóra do programa oficial do Santiaguiño do Monte como homenaxe a este animal, símbolo histórico e identitario de Galicia.
A volta do evento provocou opinións encontradas entre a cidadanía e diferentes grupos políticos, entre eles BNG e Podemos, que reclamaran expresamente unha consulta pública sobre o tema.
Os resultados do estudo tamén amosan que un 62,6% das persoas entrevistadas non considera o Derbi Asnal como unha forma de maltrato animal, fronte a un 36% que si o percibe así. A percepción varía segundo a idade: mentres un 53,7% dos menores de 30 anos considera que existe maltrato, esta porcentaxe descende ata o 25% entre os maiores de 65 anos.
En relación coa organización do evento, o 61,1% da veciñanza opina que debería ser o Concello quen asumise directamente a súa organización, mentres que un 29,6% aposta por unha entidade independente.
Tamén se preguntou sobre o lugar de celebración: o 49,3% prefire manter a carreira nas rúas do casco histórico, mentres que o 44,8% opta polo Paseo do Espolón, localización escollida este ano e que rexistrou un cheo absoluto.
A relación da cidadanía co Derbi Asnal queda patente no feito de que máis da metade (55,2%) asegura asistir habitualmente ao evento, un 23,6% participou nalgunha edición e só un 21,2% declara non ter asistido nunca.
A enquisa incluíu tamén unha pregunta sobre os fogos de artificio e bombas de palenque durante as festas: un 66,5% da poboación considéranos parte esencial da celebración, fronte a un 20,2% que se amosa en contra e un 13,3% ao que lle resulta indiferente.
O Concello destaca que estes resultados permiten coñecer con precisión a opinión dos veciños e veciñas sobre unha actividade cun forte peso tradicional e simbólico, e servirán como base para adoptar decisións informadas sobre a súa continuidade nas vindeiras edicións das festas padronesas.
