A semana pasada clausurouse a edición 2024 do Obradoiro Dual de Emprego Comarca de Sar, impulsado polos Concellos de Dodro, Padrón e Rois. No acto participou o rexedor de Dodro, Xabier Castro, quen lembrou algúns detalles relevantes sobre a iniciativa, destacando a importante formación recibida polo alumnado, as boas perspectivas de inserción laboral das e dos participantes (20 persoas das cales catro xa están a traballar) e a repercusión positiva que o obradoiro tivo para o territorio. Por exemplo no propio Consistorio, cuxo salón de plenos foi remodelado polas 20 persoas que recibiron formación teórica e práctica e que xa loce listo para ser empregado pola Corporación e a cidadanía. O alcalde sinalou que a satisfacción achegada polo obradoiro foi dobre: polo bo facer do alumnado nas obras da Casa do Concello e pola calidade da formación recibida, centrada en Atención sociosanitaria a domicilio e en Operacións auxiliares de acabados ríxidos e urbanización, dous sectores cunha alta demanda de persoal.
O acto de clausura, presidido por Anxo Arca, contou coa participación da delegada territorial da Xunta na Coruña, Belén do Campo, dos alcaldes de Rois, Ramón Tojo, e Dodro, Xavier Castro, así como da concelleira de Servizos Sociais de Padrón, Mariló Saco Vigo.
Este programa mixto de formación e emprego, promovido polos concellos de Padrón, Rois e Dodro e subvencionado pola Consellería de Promoción do Emprego e Igualdade, co-financiado polo Ministerio de Traballo e Economía Social cun investimento de preto de 423.000 euros, tivo unha duración de 12 meses. Nel participaron 20 alumnos-traballadores, once deles de Padrón, que combinaron formación teórica e práctica a través dun contrato de formación en alternancia, percibindo o salario mínimo interprofesional durante o proceso.
O Obradoiro Dual de Emprego Comarca do Sar 2024 reafirma así o compromiso dos concellos de Padrón, Rois e Dodro coa inclusión laboral e a formación profesional, sentando as bases para mellorar a empregabilidade na comarca.
