Xa atoparon traballo 4 dos 20 alumnos do Obradoiro de emprego Comarca do Sar 2024 clausurado hoxe.
A clausura deste Obradoiro celebrouse esta mañá no auditorio de Padrón coa asistencia de Anxo Arca; a delegada da Xunta na Coruña, Belén do Campo, e os alcaldes de Rois e Dodro.
O alcalde de Padrón, Anxo Arca, agradeceu esta mañá o esforzo das 20 persoas desempregadas que participaron no Obradoiro Dual de Emprego Comarca do Sar 2024, confiando en que pronto todas elas poidan incorporarse ao mercado laboral. De feito, catro participantes xa atoparon un posto de traballo grazas á formación recibida en atención sociosanitaria a domicilio e en operacións auxiliares de acabados ríxidos e urbanización, dous sectores cunha alta demanda de persoal.
O acto de clausura, presidido por Anxo Arca, contou coa participación da delegada territorial da Xunta na Coruña, Belén do Campo, dos alcaldes de Rois, Ramón Tojo, e Dodro, Xavier Castro, así como da concelleira de Servizos Sociais de Padrón, Mariló Saco Vigo.
Arca destacou na súa intervención a importancia da colaboración entre administracións para impulsar iniciativas que favorezan a inserción laboral. “Con accións como esta, dende o Concello estamos a mirar por aqueles veciños e veciñas que necesitan buscar unha saída laboral para poñer en marcha o seu proxecto de vida”, asegurou, subliñando a crecente demanda de profesionais en albanelería e axuda no fogar.
Este programa mixto de formación e emprego, promovido polos concellos de Padrón, Rois e Dodro e subvencionado pola Consellería de Promoción do Emprego e Igualdade, cofinanciado polo Ministerio de Traballo e Economía Social cun investimento de preto de 423.000 euros, tivo unha duración de 12 meses. Nel participaron 20 alumnos-traballadores, once deles de Padrón, que combinaron formación teórica e práctica a través dun contrato de formación en alternancia, percibindo o salario mínimo interprofesional durante o proceso.
O Obradoiro Dual de Emprego Comarca do Sar 2024 reafirma así o compromiso dos concellos de Padrón, Rois e Dodro coa inclusión laboral e a formación profesional, sentando as bases para mellorar a empregabilidade na comarca.
