O programa de roteiros Goza do Ulla volve a Rianxo e Dodro o vindeiro 28 de setembro cunha moi interesante ruta organizada conxuntamente entre os ditos Concellos, co obxectivo de permitir a residentes e visitantes “desfrutar da fermosa paisaxe do treito final do río e do esteiro do Ulla”. Segundo informan dende os Concellos, as inscricións están xa dispoñíbeis a través da aplicación Cluber.
O itinerario a percorrer o día 28 non é outro que o Roteiro de Sendeirismo As Brañas – Tres Cruces (desde A Lavandeira en Imo ata Rañó en Rianxo). A iniciativa conta ademais coa colaboración da Deputación da Coruña. Será o vindeiro 28 de setembro con saída ás 9.30 da mañá. Quen precise máis información tena nos teléfonos 661247136 e 689897223. As inscricións poden facerse na dita aplicación e tamén escaneando co móbil o QR do cartel desta nova experiencia de lecer deportivo e cultural de Goza do Ulla 2025.
O itinerario percorre camiños de Dodro e Rianxo, con saída na Lavandeira (Imo, Dodro) e chagada á Rañó (Leiro, Rianxo), pasando por varios lugares destacados da contorna do Ulla. Destacan o conxunto de hórreos da Lavandeira, As Brañas e As Tres Cruces, onde se atopa o Vía Crucis marítimo-fluvial do esteiro do río. O traxecto permitirá aos participantes desfrutar da paisaxe do esteiro, da ría de Arousa e da marxe oposta pertencente aos municipios de Catoira e Vilagarcía, incluíndo a illa de Cortegada.
