Este sábado 16 de agosto a Sociedade de Esteiro acolleu, con gran afluencia de residentes e visitantes, a presentación do libro Deportivo Esteirano, do autor Diego Mayo Mayo.
Trátase dunha obra que recolle a traxectoria do club que lle dá nome ao libro e tamén a historia dun pobo, Esteiro, e por extensión a memoria colectiva do concello muradán.
A publicación, que conta co apoio da Deputación da Coruña no seu lanzamento, reivindica a andaina da que sería, en palabras do autor, “a prehistoria da Sociedade Deportiva Esteirana”, sendo a denominación “Deportivo Esteirano” a vixente antes da Guerra Civil.
A publicación inclúe 227 páxinas, cunha manchea de fotografías que ilustran os inicios da práctica do fútbol na localidade muradá.
O autor, Diego Mayo, é natural da aldea de Solleiros, na parroquia de Santa Mariña de Esteiro.
