O Bloque Nacionalista Galego de Ribeira emitiu este luns unha nota de prensa na que manifesta o seu “profundo lamento” polo voto en contra do Partido Popular e do PBBI á proposta do executivo municipal para aprobar as subvencións nominativas correspondentes ao ano 2025. O BNG destaca especialmente a contradición que supón o rexeitamento do PBBI, grupo que forma parte do actual goberno local.
Segundo o BNG, esta decisión supón o bloqueo de 353.000 euros destinados a entidades sociais, culturais, deportivas, comerciais e veciñais do municipio, fondos que historicamente contaron cun consenso maioritario da Corporación Municipal.
“Resulta rechamante que o PP se opoña a unhas subvencións que xa concedía nos seus anos de goberno, e que agora mesmo inclúen máis entidades beneficiarias e con achegas superiores. Pero o caso do PBBI é aínda máis grave, ao votar en contra dunha proposta do propio executivo do que forma parte”, sinalan desde a formación nacionalista.
Subvencións sen incremento estrutural
O BNG aclara que o lixeiro incremento das partidas (50.000 euros respecto ao ano anterior) responde exclusivamente a compromisos institucionais aprobados previamente, como os 40.000 euros para o Encontro de Embarcacións Tradicionais —aprobados por unanimidade en Pleno— e os 10.000 euros acordados no seo da Mancomunidade da Arousa Norte. “Non hai, polo tanto, ningún incremento estrutural no gasto”, afirman.
O bloque tamén lembra que, ao atoparse o Concello cun orzamento prorrogado, era necesaria a ratificación expresa destas subvencións para garantir que as entidades poidan recibir as axudas. “Negarse a iso é negarse a apoiar a persoas e colectivos que traballan a diario a favor da veciñanza, da cultura, do deporte ou do comercio local”, asegurou Rafa Pazos, portavoz do BNG.
Cobro anticipado para garantir viabilidade
Como novidade, a proposta contemplaba que as entidades puidesen cobrar ata o 50% da achega de forma anticipada, co obxectivo de mellorar a súa viabilidade financeira e evitar que teñan que adiantar fondos para actividades de alto custo. Segundo o BNG, trátase dunha medida demandada polas propias asociacións e impulsada pola formación nacionalista.
Entidades afectadas
Entre as organizacións que verían conxeladas as súas axudas están colectivos que traballan na atención a persoas con diversidade funcional, loita contra a drogadicción, apoio a persoas sen recursos, promoción cultural e do patrimonio marítimo, dinamización comercial e deporte base.
Entre outras, figuran Ambar, Amicos, Cáritas, Cruz Vermella, Asociación Renacer, Asociación de Empresarios de Ribeira, Confrarías da Dorna e de Carreira e Aguiño, Museo do Gravado, Mares da Fin do Mundo, USC, Club Náutico de Ribeira, Fundación Galega contra o Narcotráfico, Encontro de Embarcacións Tradicionais de Galiza ou a Mancomunidade Arousa Norte.
Chamamento ao desbloqueo
O BNG finaliza o comunicado reiterando o seu compromiso co tecido asociativo e esixindo que os partidos que bloquearon a proposta —PP e PBBI— rectifiquen e permitan desbloquear unhas axudas que son vitais para o funcionamento e continuidade de numerosos colectivos locais. “As entidades non deben ser vítimas do cálculo electoralista nin do xogo político partidista”, conclúe.
