O próximo domingo 6 de xullo ás 19:00h, o Liceo de Noia vai dar acollida á edición 2025 do Festival Benéfico de KitisKatis Dance Class, onde a rapazada participante convidará ao público a percorrer os cinco continentes a través da danza, nun espectáculo solidario que, segundo a organización, “promete emoción, cor e moito ritmo”. Desenvolverase, de feito, baixo o epígrafe Unha viaxe polo mundo.
A recadación irá destinada integramente á Obra Social Pediatría Coidamos dos Nenos, para seguir apoiando a súa importante labor educativa e lúdica cos nenos hospitalizados no CHUS (Complexo Hospitalario da Universidade de Santiago).
As entradas están á venda no Liceo de Noia.
Nas edicións anteriores KitisKatis foi quen de superar os 1.000 euros de recadación en cada convocatoria.
Colaboran o Liceo e o Concello de Noia, xunto con Radio Líder e, por suposto, a cidadanía solidaria de Noia.
