A AECC e o Concello de Boiro volven xuntar forzas cunha nova edición da andaina solidaria Boiro, en marcha contra o cancro, que organiza a Asociación Española Contra o Cancro de Boiro (AECC) coa colaboración da Administración local e que está prevista para este domingo 22 de xuño. O alcalde, José Ramón Romero, acompañou a Marisa Lojo, presidenta da AECC de Boiro na presentación, celebrada este venres 20 de xuño no Consistorio.
Segundo explicaron, a saída da camiñada será ás 11.00 horas da praza de Galicia e contará cun percorrido circular de 5 quilómetros que percorrerá o paseo do río Breiro, o paseo marítimo de Barraña e o esteiro do río Coroño para volver á praza de Galicia.
As inscricións seguen abertas teñen un prezo de 8 euros para persoas adultas e 5 euros para nenos e nenas menores de 12 anos e poden facerse na Farmacia Ortopedia Ana Torrente, na Galería Sargadelos, en Modas Naty, online na web da AECC e nas mesas da asociación.
