O Concello de Boiro impulsa un grupo de monologuistas, unha actividade destinada á mocidade e que conta co apadriñamento do actor Luis Zahera. A concelleira de Cultura, María Outeiral; a concelleira de Ensino, Carmen Silva; o propio Luis Zahera e a mestra de Filosofía do IES Praia Barraña, Lidia Queipo, presentaron este martes 17 de xuño a iniciativa.
“Dende o Concello de Boiro estamos moi contentos de que saia adiante esta iniciativa que naceu dunha olimpíada filosófica”, afirmou Carmen Silva, engadindo que ” a iniciativa naceu do alumnado do IES Praia Barraña que participou este ano na olimpíada de filosofía”.
“Este ano implementouse o monólogo e o alumnado do centro preparou uns moi elaborados nos que lograron quedar finalistas”, recoñeceu Lidia.
A raíz deses monólogos fíxose no local Leñaverde do Centro Social de Boiro unha actividade para que os rapaces realizaran os seus propios monólogos, unha iniciativa que tivo moi boa acollida e da que xurdiu a idea de ampliala e crear un grupo de xente moza.
“Dende o Concello de Boiro imos apoiar sempre iniciativas como esta pensadas polo mocidade e que creen espazos e alternativas para eles”, afirmou María Outeiral.
O grupo de monologuistas conta cun padriño de honra, o actor Luís Zahera gañador de dous premios Goya. “Os monólogos serven para alegrar os corazóns e eu quero agradecer á rapazada que se está a implicar neste novo proxecto e agardo que o desfruten”.
