O xerente do Consorcio Galego de Servizos de Igualdade e Benestar, Perfecto Rodríguez, visitou hoxe o centro de día de Outes, pertencente á rede pública autonómica, para coñecer de primeira man as melloras realizadas recentemente nas instalacións. Estivo acompañado polo alcalde do municipio, Francisco Calo.
O pasado ano acometeuse a renovación parcial do mobiliario do centro, cun investimento de 15.000 euros destinado á adquisición de cadeiras para o comedor, butacas para o descanso das persoas usuarias e equipos de televisión. Esta actuación forma parte das accións periódicas de mellora que o Consorcio desenvolve nos seus centros ao longo do territorio galego.
O centro de día de Outes, con capacidade para 30 prazas, presta un servizo de atención diúrna de carácter comarcal, dirixido a persoas maiores do propio concello e doutros limítrofes. Actualmente, atende a 24 usuarios procedentes de Outes, Noia, Mazaricos e Negreira.
Durante a visita, Perfecto Rodríguez destacou a importancia da colaboración institucional para mellorar os equipamentos sociais e puxo en valor a boa relación entre a Xunta de Galicia e o Concello de Outes. Así mesmo, expresou a disposición do Goberno galego a colaborar na valorización das dúas plantas actualmente sen uso do edificio que alberga o centro de día, unha iniciativa impulsada polo alcalde, quen pretende destinalas a actividades de carácter social.
Esta actuación exemplifica o compromiso das administracións coa mellora da calidade de vida das persoas maiores e co aproveitamento eficiente dos recursos públicos ao servizo da comunidade.
