Este mércores, as Rías Baixas vivirán unha xornada marcada pola inestabilidade meteorolóxica debido á presenza dun embolsamento de aire frío en altura, situado ao oeste de Galicia. Esta situación provocará intervalos nubrados e a posibilidade de chuvascos intermitentes, especialmente na franxa atlántica, onde se agarda que se intensifiquen cara ao final do día.
As temperaturas sufrirán un notable descenso, especialmente nos valores máximos, deixando atrás os rexistros máis propios do verán que se viñan notando nos últimos días. Esta baixada será perceptible tanto nas zonas costeiras como no interior da comarca.
Os ventos soprarán con intensidade desde o sur-suroeste, sendo moderados en xeral, pero fortes no litoral atlántico.
A inestabilidade podería continuar nos vindeiros días, polo que se aconsella seguir as actualizacións da previsión meteorolóxica.
O noso mar: Vento do sur á mañá, do sur á tarde e do sudoeste á noite, forza 4 a 6 á mañá, 5 a 6 á tarde e 4 a 5 á noite. Forte marusía. Visibilidade boa. Mar de fondo do noroeste, con ondas de 0.5 a 1.5 metros á mañá e 1 a 1.5 metros á tarde e á noite.
