A Pobra do Caramiñal vivirá este venres, 23 de maio, un dos actos centrais do Maio das Letras coa estrea da curtametraxe Adeus, Berta, unha peza dirixida por Fernando Tato e rodada no propio municipio.
A cita será ás 19.30 horas no Cine Elma, e incluirá non só a proxección do filme, senón tamén unha charla-faladoiro co director e parte do equipo de produción, así como un cóctel, sesión de DJ e photocall.
Durante a presentación, a concelleira de Cultura, Patricia Lojo, destacou que se trata dunha “oportunidade única para gozar dunha obra ambientada no noso municipio” e animou á veciñanza a asistir. Adeus, Berta narra a historia de Alicia, que regresa á casa dos seus pais na Pobra, onde se reencontra coa súa irmá Berta, recentemente saída dun centro de rehabilitación. O filme explora a reconstrución da relación entre ambas nun entorno cargado de emocións e lugares recoñecibles para a poboación local.
A entrada será de balde ata completar aforo.
“Xoga ao Baile Deportivo” achega ritmos á mocidade da Pobra
Tamén esta semana terá lugar Xoga ao Baile Deportivo, un programa impulsado polo Taller Alecrín en colaboración coa Concellería de Cultura e dirixido ao alumnado do CEP Plurilingüe Salustiano Rey Eiras.
A actividade desenvolverase entre os días 21 e 23 de maio, en horario de 12.00 a 14.00 horas, e permitirá ao alumnado coñecer e practicar distintos estilos de baile deportivo, como o valse inglés, o valse vienés, a rumba e o chachachá. A iniciativa culminará cunha competición final na que os estudantes demostrarán o aprendido.
