O Concello de Noia impulsou estes días diversas frontes de traballo destinadas a mellorar o día a día dos veciños e poñer a punto infraestruturas e servizos. Unha das liñas de traballo focalizouse no núcleo de Castro Lampreeiro, onde, segundo informaron fontes do Consistorio, proseguen a bo ritmo as obras para acondicionar o rueiro. Esta semana achegáronse ata alí o alcalde, Santiago Freire, e a concelleira de obras, Laura Salgado, para revisar os traballos que se están a desenvolver. Indicaron que nas vindeiras semanas comezarán novas actuacións en Barro e Cruceiro de Barro, así como en Albariza e Boa.
Engadiron que “desde o Concello de Noia seguimos apostando pola mellora das infraestruturas no rural, co obxectivo de garantir servizos de calidade para todas as veciñas e veciños.
A maiores, as brigadas municipais estiveron realizando traballos de limpeza, roza e acondicionamento en diferentes puntos do concello: Boa, A Fialla, San Bernardo, A Rasa, Pontenafonso, Mirou, Fonte Perocas, Campo de Lamas, Xei, Ponte da Traba, Sofreixos, Campo de Noia e Orro.
Estas actuacións foron coordinadas pola Concellería de Parques e Xardíns, dirixida por Ana García, co obxectivo de “mellorar a imaxe e funcionalidade destes espazos, facendo de Noia un lugar máis limpo, seguro e agradábel”, indicou.
