O Concello de Boiro comeza a campaña de rozas en todas as parroquias do municipio, que se realizan dúas veces no ano. O alcalde, José Ramón Romero, cos concelleiros de Medio Ambiente, Olga González, e Medio Rural, Francisco Bermúdez, supervisaron os traballos na mañá deste 7 de maio.
As actuacións comezaron na parroquia de Bealo e iranse facendo de xeito progresivo en todo o termo municipal, está previsto que esta primeira pasada remate en tres meses e, de cara ao inverno, farase unha segunda pasada por todos os núcleos.
As tarefas de roza realízanse en vías, pistas e camiños de titularidade municipal de xeito mecánico e manual para adaptarse ás características de cada espazo, incidindo especialmente naqueles lugares nos que pode existir un perigo por motivos de visibilidade de condutores e peóns, así como para a prevención de lumes.
