A cita reunirá arredor de dez clubs da zona norte de Galicia nas categorías cadete, xuvenil e absoluta, tanto na modalidade feminina como masculina
A Pobra do Caramiñal converterase esta fin de semana no centro neurálxico do remo galego coa celebración do Campionato Territorial Norte de Traiñeiriñas, unha competición que reunirá arredor dunha decena de clubs da zona norte de Galicia. A cita desenvolverase nas categorías cadete, xuvenil e absoluta, tanto feminina como masculina.
A proba disputarase en dúas xornadas. A clasificatoria terá lugar o sábado 10 de maio ás 16:00 horas, mentres que a final celebrarase o domingo 11 ás 11:00 horas. Durante a fase previa, os equipos buscarán situarse entre os cinco primeiros postos de cada categoría para acceder á final dominical.
Os catro mellores clasificados de cada categoría obterán o pase directo ao Campionato Galego ‘Xunta de Galicia’ de Traiñeiriñas, previsto para a seguinte fin de semana en Cabo de Cruz (Boiro). As distancias a percorrer serán de 1.750 metros para a categoría cadete e de 3.500 metros para as xuvenil e absoluta.
A presentación oficial do evento tivo lugar esta mañá, coa presenza do alcalde da Pobra, José Carlos Vidal, acompañado polo presidente do Club de Remo Puebla, Emilio José Dieste, e polo vicepresidente da Federación Galega de Remo, Gustavo Vázquez.
Durante o acto, o rexedor local destacou que “é unha honra para A Pobra acoller un evento deste nivel, que pon en valor o noso litoral, promove o deporte base e reforza o papel do remo no noso concello”.
O Campionato Territorial Norte de Traiñeiriñas promete ser unha gran festa do remo e unha mostra do talento deportivo da mocidade galega.
