Entre as 12 e as 19 horas deste venres, o Centro Integrado de Atención ás Emerxencias contabilizou un total de 50 incidencias polos efectos das tormentas e as chuvias. A provincia de Pontevedra foi a máis castigada, coa maioría dos casos (36).
As tipoloxías máis repetidas foron os restos e obxectos que puideron acabar nas estradas (10) e os avisos por anegamentos en rúas (9), seguidos das actuacións dos servizos de emerxencias para previr riscos maiores (6), coma o saneamento de fachadas (6).
Máis aló das máis de trinta de incidencias rexistradas na provincia de Pontevedra, destaca a da Coruña (11), moi por enriba das 3 de Ourense. En Lugo non se contabilizaron casos relacionados coa meteoroloxía adversa.
Por último, os Concellos máis afectados segundo os datos do 112 Galicia foron Vigo (10), Tui (5), Redondela (5) e Santiago e Pontevedra, con 3 incidencias cada un.
Incidencias destacadas
Aínda que ningún dos sucesos reportou danos persoais, destacamos as chamadas de dous particulares, desde Mos e O Porriño, respectivamente.
No primeiro caso, tratouse dun accidente de coche no quilómetro 154 da N-550, dez minutos despois das 17 horas. O propio condutor implicado explicou que lle caera unha árbore enriba do vehículo cando estaba circulando.
Desde o 112 Galicia alertouse á Garda Civil de Tráfico, á Policía Local e ao GES de Mos.
Uns minutos antes, un particular chamou desde O Porriño informando de que un raio acababa de caer sobre un transformador. Aínda que non ardía, o alertador asegurou que varias vivendas quedaron sen luz.
Os xestores do Centro Integrado de Atención ás Emerxencias pasaron o aviso á Policía Local.
