Xa queda menos para que os peregrinos e peregrinas que escollen o Camiño da Ría Muros-Noia poidan descansar no novo albergue da Chaínza, en Noia. Así o confirmaron o Concello e máis a Xunta este 23 de de abril, no transcurso dunha visita institucional á antiga curtidoría da familia Cadarso, agora convertido en establecemento para peregrinos e viaxeiros, da conselleira de Medio Rural, María José Gómez, a directora xeral Paz Rodríguez e a delegada territorial Belén do Campo, acompañadas do alcalde Santiago Freire e de parte do seu equipo de Goberno, por exemplo a edil Laura Salgado.
O Concello definiu o inmóbel rehabilitado como “un espazo con encanto” que suma, dinamiza e pon en valor o noso patrimonio e o potencial do Camiño de Santiago pola ría de Muros e Noia.
O novo albergue, para quen non o saiba, é unha antiga fábrica de curtidos do século XVIII rehabilitada a través do un proxecto impulsado polo Concello e a Xunta, grazas á intervención LEADER da Consellería do Medio Rural que destinou 200.000€ a esta actuación.
Durante o seu percorrido polo establecemento hostaleiro a conselleira salientou a importancia do programa LEADER, que “ten como obxectivo impulsar o desenvolvemento rural a través dunha estratexia participativa, baseada nun enfoque de abaixo cara arriba, garantindo a participación activa dos principais axentes locais nestas políticas”. Esta intervención, dixo, “ten repercusións especialmente positivas no tecido socioeconómico das contornas rurais, xa que contribúe a mellorar as condicións para crear e manter emprego no rural; así como a fixar poboación”.
