Dende o Concello de Porto do Son lembran que xa podemos consultar novo informe sobre o Programa de vixilancia sanitaria das zonas de baño elaborado pola Dirección Xeral de Saúde Pública da Consellería de Sanidade, no que se dá conta, entre outros parámetros de interese, da calidade das augas dos diferentes areais e áreas de baño da xeografía galega. No caso de Porto do Son volve acadar un pleno de calidade excelente para todas as súas praias. Semellantes cualificacións positivas (excelentes) obtiveron Boiro (con Peralto pendente de confirmar datos, xa que se atopa en fase de avaliación), A Pobra, Rianxo, Ribeira e Outes. Ningún destes concellos figura na listaxe de aqueles onde se rexistraron zonas de baño prohibidas.
Nesta listaxe de areais con prohibición permanente volven figurar Testal (Noia) e a A Virxe do Camiño (Muros). No resto de areais de Noia e Muros está permitido o baño. No caso de Muros, o concello obtén a cualificación de excelente para a súa vintena de areais (agás A Virxe do Camiño). Por outra banda, Boa Grande e Boa Pequena (Noia) tamén obteñen o mesmo recoñecemento.
