O Concello de Lousame organiza un contacontos sensorial para bebés, que terá lugar na Casa da Cultura o próximo sábado 12 de abril, ás 12:00 horas. Durante media hora, nenos e nenas de idades comprendidas entre os 0 e os 3 anos desfrutarán dunha sesión que mestura voz, música, cores e sensacións.
A concelleira de Cultura, Silvia Agrafojo, sinala que “os primeiros anos de vida dos nosos nenos e nenas son moi importantes no seu desenvolvemento sensorial, sensitivo, emocional, intelectual e afectivo. Por iso, a través de sesións coma este contacontos sensorial axudámolos no seu desenvolvemento neuronal, no desenvolvemento da súa imaxinación e no amor polos libros, ademais de darlles unhas pautas ás familias para que lles sigan lendo, cantando e desfrutando da lectura nas súas casas”.
Unha iniciativa iniciada o ano pasado cun contacontos realizado por Raquel Queizás e que ten continuidade este ano dentro das actividades de promoción da lectura organizadas polo Concello de Lousame, en colaboración coa Consellería de Cultura, Lingua e Xuventude, dentro do programa Ler conta moito. O número de prazas é limitado e as inscricións son de balde e por orde de anotación a través de www.bandoticket.com.
