Este mércores 2 de abril a Asociación Ambar das persoas con Diversidade Funcional, con sede no Barbanza, organizou unha xornada de ioga impartida por Sara de Onda Yoga Portosín para conmemorar o Día Mundial da Concienciación sobre o Autismo.
A sesión de ioga realizouse no Polideportivo de Venecia do Concello da Pobra do Caramiñal. Foi unha xornada aberta e cen por cen participativa, de xeito que todas as persoas que desexaron participar tiveron a oportunidade de facelo.
Foi unha sesión enfocada na respiración e no ioga para a saúde. Na xornada estiveron presentes arredor de 40 persoas, participaron persoas usuarias de Ambar, profesionais da asociación e tamén persoas da comunidade que se inscribiron para participar na actividade en comunidade.
Ao remate da actividade, gran parte do grupo de persoas participantes prolongaron a súa estadía no Pavillón para representar unha X para participar na Campaña da X Solidaria, impulsada pola EAPN Galicia, e que tamén foi celebrada esta mañá na Praza da Quintana de Santiago de Compostela.
