A subdelegada do Goberno na Coruña, María Rivas, presidiu este martes 1 de abril a xunta de seguridade na que se ultimou o dispositivo encargado de velar pola seguridade na 39ª edición do Rali Berberecho de Noia. Na mesma, fixo un chamamento a cumprir “as normas e a respectar a sinalización e as indicacións do persoal para que a xente poida gozar deste espectáculo coas máximas garantías de seguridade”.
Na reunión, na que participaron responsábeis da organización da proba (a Escudería Berberecho), así como da Garda Civil, Subsector de Tráfico, Policía Nacional, Xefatura Provincial de Tráfico, Protección Civil, policías locais e representantes da Xunta e dos concellos polos que discorrerá a proba, a subdelegada destacou o esforzo do Goberno para, a través das Forzas e Corpos de Seguridade do Estado, velar polo correcto desenvolvemento das probas e competicións deportivas que se desenvolven na provincia.
María Rivas incidiu na necesidade de que, tanto os corredores participantes e moi especialmente todo o público que se congregará para presenciar o paso do Ralli polas estradas da provincia, “sexan respectuosos coa sinalización e as indicacións do persoal que se ocupará da seguridade da proba e, no caso dos espectadores, a manterse sempre dentro dos espazos delimitados para eles”.
A subdelegada aproveitou para felicitar á escuadra Berberecho pola organización do evento, un da de máis afluencia do campionato, no que participarán un total de 155 pilotos, entre eles tres con vehículos World Rally Car, homologados para o mundial.
A proba percorrerá os concellos de Noia, Lousame, Brión, Rois, Rianxo e Dodro.
