O Plan de Mobilidade do Centro Dramático Galego convida o público de Ribeira a ir a Santiago ao teatro, concretamente para asistir á representación da obra A burra, a mesa e o pau. Esta terá un custo de 5 € por persoa, incluíndo desprazamento en autobús. Será o 19 de marzo, mércores, con hora de saída fixada para as 16.00 h desde Ribeira. A cita será na sede habitual das representacións do CDG, o Salón Teatro de Santiago.
Reservas no teléfono 981 835 650 (de luns a venres de 9 a 14 h) ou en normalizacion@ribeira.gal.
O Centro Dramático Galego ofrecerá até o 20 de abril, no Salón Teatro de Santiago, cinco funcións de A burra, a mesa e o pau. A montaxe, con dirección e dramaturxia de Lorena Conde, conta cun elenco de 15 actores e actrices que integran Xúlio Abonjo, Maika Aguado, Beatriz Barcia, Xosé Manuel Esperante, Andrés Giráldez, Alixa Ladson, Roberto Leal, Mario López, Pablo Loureiro, Carla Mojón, Grial Montes, Paloma Otero, Paulo Serantes, Nelu Vermouth e Arantza Villar para dar vida a unha proposta escénica ideada como unha fábula arredor dunha familia obreira galega desexosa de atopar solucións máxicas para saír da súa precariedade.
A burra, a mesa e o pau dispón de interpretación a lingua de signos, subtítulos para os dispositivos móbiles, programa de lectura fácil e, nas sesións descontraídas dos mércores, o acondicionamento especial da sala. Con esta función consolidouse a campaña de mobilidade Sobes ao autobús do teatro?, que facilita servizo gratuíto de autocares para ver o espectáculo e á que xa se sumaron 65 concellos das catro provincias, incluído Ribeira.
