A patronal de empresas noiesas, Noia Histórica, en colaboración coa Xunta de Galicia e o Concello, lanzou este xoves 13 de marzo a nova edición da súa Campaña do Día Pai, destinada a render homenaxe aos pais de familia en calquera das súas vertentes e diversidades ao tempo que se dinamiza o comercio local apostando polos produtos e servizos das tendas e dos establecementos de Noia e da súa contorna.
A campaña, activa dende xa, foi presentada no centro histórico de Noia por Mateo Caamaño, tesoureiro da patronal, e Mª Jesús Froján, vogal da entidade, ambos pertencentes ao tecido comercial da vila e do concello.
Segundo explicaron, a campaña estará vixente ata o 19 de marzo. O día 20 Noia Histórica procederá ao sorteo de dous circuítos termais La Novena no Spasinho para 2 persoas, nas Cabañitas do Bosque.
Trátase, explicaron, “dun importante agasallo nun establecemento único cunha demanda espectacular localizado na Serra de Outes”.
Para participar as persoas clientes terán que subir á web de Noia Histórica os tíckets de compra de entre o 13 e o 19 de marzo, no apartado de sorteos online.
E unha campaña financiada pola Xunta de Galicia.
