A Garda Civil de Boiro detivo a un veciño de Lousame como presunto autor do roubo, en dúas ocasións, de varias imaxes relixiosas e outros obxectos de culto da capela de Santa Rita de Ponte Beluso, en Boiro .
Segundo informou o Instituto Armado nun comunicado, o sospeitoso facíase pasar por operario dunha empresa de obras e servizos para perpetrar os roubos.
Grazas ás investigacións levadas a cabo, as autoridades lograron recuperar os obxectos subtraídos, entre eles dúas imaxes da Virxe Santa Rita, un cadro dun Cristo e un rosario. A Garda Civil destacou que estes elementos, doados por fregueses e devotos, teñen un gran valor simbólico e sentimental para a comunidade.
O detido enfronta cargos por dous delitos contra o Patrimonio e a Orde Socioeconómica –roubo e furto–. As dilixencias foron remitidas ao Xulgado de Primeira Instancia e Instrución de Garda de Ribeira.
