O PSOE de Rianxo, a través do seu voceiro Óscar Rial, emitiu un comunicado no que mostra a súa disconformidade co Concello respecto á súa posición sobre o regulamento de atención temperá. Os socialistas critican que “todas as alegacións do PSOE foron destestimadas polo Goberno rianxeiro, unha decisión que demostra a falta de preocupación do Executivo pola calidade do servizo e polas familias que dependen del”.
Engaden que “dende o PSOE de Rianxo levamos tempo advertindo que o regulamento inicial é demasiado xenérico e deixa sen regular aspectos clave, como os perfís profesionais dispoñibles, a entrega de informes iniciais, o traballo interdisciplinar con outras entidades ou empresas, a creación de sinerxías positivas e a adecuación dos espazos, e malia todo isto o Goberno local decidiu ignorar todas estas propostas de mellora, sen dar marxe ao diálogo nin á procura de solucións que realmente respondan as necesidades do municipio”.
Explican que esta situación será levada ao próximo pleno, onde o PSOE abrirá o debate co ánimo de que “o resto de forzas políticas vexan a necesidade desta modificación e co obxectivo de lograr un regulamento máis adecuado á realidade de Rianxo”, adiantaron, mostrando a súa confianza “en que, neste proceso, prevaleza a cordura e o interese xeral das familias afectadas, e se poida traballar nunha normativa que garanta un servizo de atención temperá de calidade”.
Engaden que os “socialistas levamos máis dun mes esperando para manter unha reunión coa empresa xestora e a concelleira de Servizos Sociais co obxectivo de analizar aspectos clave do servizo e expor posíbeis melloras”. E conclúen: “O Partido Socialista de Rianxo seguirá defendendo ás familias e reivindicando un regulamento máis completo e xusto, que non deixe sen resposta as demandas de quen máis o necesitan”.
