O Concello de Rianxo anunciou que ten dispoñíbeis composteiros para seren repartidos entre a veciñanza, que deberá contactar coa Administración local a través do 667 18 55 79 para facerse cun equipamento destas características.
Dende o Concello lembran que aproximadamente o 50% da bolsa do lixo é materia orgánica e que “favorecer que este tipo de residuos non acabe no colector supón diminuír o gasto enerxético do seu tratamento, así como un aforro para as arcas municipais”.
Durante o ano 2024 o Concello de Rianxo repartiu 125 composteiros domésticos entre todos os veciños e veciñas que os solicitaron e instalou cinco colectores orgánicos comunitarios en diferentes puntos da vila.
“Se as veciñas e veciños teñen un pequeno espazo verde ao redor da súa vivenda poden solicitar xa o seu composteiro doméstico e sumarse á iniciativa”, informou o Concello no seu chamamento á veciñanza, engadindo que “compostar é a forma natural de reciclar”.
Ademais, nas próximas semanas procederase coa implantación do colector marrón en diferentes puntos do municipio coa finalidade de dar cumprimento á normativa vixente na materia e seguir mellorando na xestión do lixo.
