Este luns 6 de xaneiro, tal e como informamos dende O Barbanza, foi localizado na praia da Arnela o corpo sen vida dunha muller, sobre as 14.00 horas, logo de que un particular que paseaba pola pasarela de madeira costeira do concello sonense dera aviso ao 112 Galicia tras atopar o cadáver, que se achaba en avanzado estado de descomposición e fortemente mancado polo bater do mar, sobre a area.
Logo de que a Garda Civil iniciase a investigación para esclarecer os feitos, barállase a posibilidade de que a forte ondada e as mareas vivas desta recta final do Nadal trouxeran o corpo, correspondente a unha muller de entre 50 e 60 anos, dende o norte de Portugal.
A principal hipótese indica que se trataría dunha muller natural de Venezuela desaparecida hai uns días na localidade lusa de Esposende.
As primeiras investigacións realizadas indican que, malia que o corpo non presentaba documentación algunha nin aveños persoais de ningún tipo que contribuísen a determinar a súa identidade, a muller, pola súa complexión e polas características das roupas de deporte que levaba, podería tratarse da persoa desaparecida en Portugal, e máis tendo en conta que tanto nesta época, coma noutras épocas do ano, as correntes oceánicas, con ventos predominantes do sur-suroeste, favorecen o achado o noso litoral de restos procedentes do país veciño.
A autopsia levarase a cabo este martes 7 de xaneiro e permitirá coñecer as causas e o tempo que a falecida leva morta.
