Na mañá deste martes de 3 decembro a entidade inclusiva barbanzá Ambar (Asociación Ambar das Persoas con Diversidade Funcional) conmemorou o Día Internacional das Persoas con Diversidade Funcional na praza Alcalde Segundo Durán da Pobra do Caramiñal.
O obxectivo da actividade, que contou coa colaboración do Concello, foi “poñer en valor a diversidade a través da creación dun ambiente de aprendizaxe e diversión no que as persoas usuarias do centro, expertas en cada unha das áreas na que se desenvolven no día a día, guiasen a actividade para dar a coñecer todo o que se leva a cabo na asociación”.
A esta xornada asistiron arredor de 400 persoas que participaron en actividades coma o mural colaborativo, no obradoiro de artesanía creando unha bolsa estampada ou un chaveiro ambareño, nos xogos populares e tamén na creación dunha árbore de Nadal diversa, onde cada persoa que asistiu puxo nun papel o que para ela significa a diversidade.
As persoas que o desexaron tamén pasaron por un stand de maquillaxe e sacaron unha foto de recordo no photocall de Ambar.
Á actividade tamén acudiron Asociacións e Colexios da zona como o CEP Plurilingüe Salustiano Rey Eiras, o CEP Plurilingüe Pilar Maestu, A Creba e AGADEA.
Durante a xornada estiveron presentes Amparo Cerecedo, concelleira de Servizos Sociais da Pobra e Milagros Rey, presidenta de Ambar e quen tamén participou na lectura do manifesto xunto con Manuel Vilas, Vanesa Villar, Noelia Argibay e Olaia Pérez.
Manifesto polo Día das Persoas con Diversidade Funcional
“Estamos moi felices de celebrar un ano máis todos xuntos o Día Internacional das Persoas con Diversidade funcional. Todos baixo un mesmo paraugas, traballando por un mesmo obxectivo: impulsar vidas independentes en comunidade.
É un día para celebrar as nosas fortalezas e defender os nosos dereitos. Todas as persoas teñamos a condición que teñamos, debemos vivir con dignidade.
Queremos participar de forma activa na sociedade e loitar por estar representados en todos os ámbitos.
Debemos fomentar unha visión positiva e realista da diversidade.
Reclamamos a inclusión laboral e educativa, con apoios xustos e razoables para todos.
Demandamos un apoio integral e real ás familias e persoas coidadoras.
Aínda na actualidade existen barreiras físicas e cognitivas. Por iso, esiximos que se cumpra a
normativa de accesibilidade en todos os espazos, públicos e privados.
Rexeitamos calquera tipo de discriminación e estamos a favor dunha sociedade diversa e plural,
con oportunidades para todos.
Temos dereito a ter traballo, parella, a unha escola e lecer inclusivos.
Queremos desfrutar da vida con total liberdade, que nos teñan en conta.
Necesitamos o apoio das administracións para unha sanidade e atención social de calidade.
Esiximos máis investigación para facer realidade un mundo realmente inclusivo, con oportunidades
para todas as persoas.
Unha sociedade diversa é unha sociedade mais enriquecida”.
